Ontwikkeling gee ekonomie ’n inspuitinG - JANUARY 2007

Susan Maré

DIE grootste ontwikkeling nóg in Bethlehem se geskiedenis – ’n onwikkeling van sowat R1 biljoen by Gobles Folley wat ’n waterfront insluit – is pas deur die Orion-groep van Johannesburg aangekondig.

Mnr. Franz Gmeiner, uitvoerende hoofamptenaar van die groep, sê dié ontwikkeling sluit regstreeks aan by die woonbuurte La Provence en Jordania, die casino en die Bethlehemse lughawe.

Sodra alle reëlings in plek is, oor sowat 12 tot 15 maande, sal in alle erns met die bouwerk begin word. Die eerste fase is ’n kleinhandelwinkelsentrum van ongeveer 40000m².

Die ontwikkeling sluit ’n waterfront in, asook ’n winkelkompleks met talle sakemoontlikhede waarvan Pick & Pay reeds 6000m² bespreek het, ’n hooggegradeerde en voldienshotel van die Orion-groep, ’n aftreeoord, luukse hoëdigtheidsbehuising, deeltitelwoonstelle en vele meer.
Dié werkskeppende ontwikkeling in samewerking met die konsortium Orion Real Estate en ’n swartbemagtigingsgroep, Blacky, sal in fases geskied. Verskeie plaaslike firmas, asook tydelike en permanente werkers, gaan hierby baat.

“Ons gaan probeer om dié ontwikkeling te bespoedig. Die Oriongroep se genoteerde aandele sal na verwagting weens die ontwikkeling ’n stewige hupstoot kry en ons verwag dat eiendomswaarde in die omgewing van Gobles Folley aansienlik sal styg tot voordeel van dié gemeenskap,” sê Gmeiner.

Die Orion-groep is in 1991 deur Gmeiner gestig en is sedert Maart 2006 op die Johannesburgse Aandelebeurs gelys. Die maatskappy se visie is om na 50 lande uit te brei en dit kan slegs bereik word as al sy kliënte en gaste ’n Star Above-ervaring beleef. Dit is presies wat Orion met Gobles Folley in gedagte het, sê Gmeimer. .’n Woordvoerder van die Dihlabeng-munisipaliteit sê dit is maar die begin van ’n hele paar ekonomiese ontwikkelings en verrassings vir die Bethlehemse gemeenskap. Die munisipaliteit wil graag vir Dihlabeng ekonomiese welvaart te skep. Die dorp huisves op die oomblik ’n kleinhandel-gedeelte van sowat 30000m² onder dak en het volgens wetenskaplike navorsing die potensiaal om nog sowat 30000m² te dra: “Bethlehem is dus lewensvatbaar vir ontwikkelings soos dié by Gobles Folley.” .Die bemarking van die ontwikkeling sal plaaslik deur mev. Rina Swanepoel van Rina & Tokkies-Eiendomme gehanteer word. Sy kan reeds vir inligting gebel word. Swanepoel se kommentaar aan Vrystaat: “Bethlehem se ekonomie beur met brute krag vorentoe kan nie meer gestop word nie.”